মুখ্যমন্ত্ৰী ড০ হিমন্ত বিশ্ব শৰ্মাৰ জন্মদিনৰ দিনাই উদ্বোধন কৰা হ’ব গুৱাহাটীৰ ফেন্সী বজাৰত নিৰ্মান কৰি থকা মহাত্মা গান্ধী পথৰ ফুট অভাৰ ব্ৰীজ।
এই ফুট-অভাৰ ব্ৰীজখনে এটা বৃহৎ এলেকা সাঙুৰি আছে। ইয়াৰ এটা মূৰ পিডব্লিউডি চৌহদৰ সন্মুখত আৰু আনটো মূৰ ব্ৰহ্মপুত্ৰ ৰিভাৰচাইডত আছে। সূত্ৰ অনুসৰি দলংখনৰ মুঠ বাজেট ১৬.৬০ কোটি টকা।
আনহাতে, দলংখনৰ নিৰ্মাণৰ দায়িত্ব অনিল দাসক দিয়া হৈছিল। এই দলংখনৰ দৈৰ্ঘ্য 73.93 মিটাৰ, মধ্যমাৰ পৰা নদীৰ পাৰলৈ ডেকৰ দৈৰ্ঘ্য 11 মিটাৰ, ফুট অভাৰ দলংখনৰ মাজৰ পৰা পি.ডব্লিউ.ডি চৌহদৰ ফালে ডেকৰ দৈৰ্ঘ্য 9.65 মিটাৰ আৰু মধ্যমাৰ সৈতে ডেকৰ দৈৰ্ঘ্য 53.28 মিটাৰ। ফুট অভাৰ দলংখনৰ ডেক স্তৰত প্ৰস্থ 3.10 মিটাৰ, মাটিৰ স্তৰৰ ওপৰত ইয়াৰ উচ্চতা 10.9 মিটাৰ।
উল্লেখ্য যে ফুট অভাৰ দলংখনত বিকলাঙ্গ লোকসকলৰ বাবে দুয়োফালে এলিভেটৰ থাকিব। ইয়াত সুৰক্ষাৰ বাবে চিচিটিভি কেমেৰা, নিৰৱচ্ছিন্ন বিদ্যুৎ যোগানৰ বাবে ডিজেল উৎপাদন ছেট, এলিভেটৰ শ্বাফ্টত বিশেষ গ্ৰেনাইট ক্লেডিং, এলুমিনিয়াম কম্পোজিট পেনেলযুক্ত চিলিং , বিশেষ ছাঁদ, বিশেষ আলোকসজ্জা আৰু ষ্টেইনলেছ ষ্টীল ৰেলিং আছে।