গুৱাহাটী : বুধবাৰে মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত হয় ৰাজ্য চৰকাৰৰ কেবিনেট বৈঠক। আজিৰ কেবিনেট বৈঠকত গ্ৰহণ কৰা হয় কেইবাটাও গুৰুত্বপূৰ্ণ সিদ্ধান্ত। ইয়াৰ ভিতৰত ৰাজ্যত নতুনকৈ ৪ টা ফৰেনচিক লেবৰেটৰি স্থাপনৰ অনুমোদন জনোৱা হয় কেবিনেটত। ফৰেনচিক লেবৰেটৰিকেইটা শিলচৰ চিকিৎসা মহাবিদ্যালয়, ডিব্ৰুগড়ৰ অসম চিকিৎসা মহাবিদ্যালয়, তেজপুৰ চিকিৎসা মহাবিদ্যালয় আৰু বঙাইগাঁও অসামৰিক চিকিৎসালয়ত স্থাপন কৰা হ’ব বুলি সিদ্ধান্ত গ্ৰহণ কৰা হয়।নতুনকৈ স্থাপন কৰিবলগীয়া ফৰেনচিক লেবৰেটৰিকেইটা কাৰ্যক্ষম হৈ উঠিলে অপৰাধ অনুসন্ধান ব্যৱস্থা অধিক শক্তিশালী হ’ব বুলি কেবিনেট বৈঠকত আশা প্ৰকাশ কৰা হয়।

দ্বিতীয়তে শিশু আৰু গৰ্ভৱতী মহিলাৰ পৰিপুষ্টিৰ বাবে সমাজ কল্যাণ বিভাগে ৰূপায়ন কৰা ‘পৰিপূৰক পুষ্টি আঁচনি’খন অধিক গতিশীল কৰি তুলিবলৈ এই আঁচনিৰ অধীনত ক্ৰয় কৰা চাউল ভাৰতীয় খাদ্য নিগমৰ পৰা পোনপটীয়াকৈ ক্ৰয় কৰাৰ বাবে কেবিনেটে সিদ্ধান্ত গ্ৰহণ কৰে। ইয়াৰ ফলত চৰকাৰী ধনৰ ৰাহি হোৱাৰ লগতে সেই ধনেৰে অন্যান্য পুষ্টিকৰ সামগ্ৰী ক্ৰয় কৰি যোগান ধৰা হ’ব। তদুপৰি এতিয়াৰে পৰা এই আঁচনিখনৰ ৰূপায়নত চিলিং ব্যৱস্থা প্ৰযোজ্য নহ’ব।

আজিৰ কেবিনেটে বৈঠকত ৰাজ্যত নতুনকৈ প্ৰতিষ্ঠা কৰা ৫ খন বিশ্ববিদ্যালয় ক্ৰমে নাৰায়নপুৰস্থিত মাধৱদেৱ বিশ্ববিদ্যালয়, বজালীৰ ভট্টদেৱ বিশ্ববিদ্যালয়, মাজুলী সাংস্কৃতিক বিশ্ববিদ্যালয়, গোলাঘাটৰ সতী সাধনী বিশ্ববিদ্যালয় আৰু হোজাইস্থিত ৰবীন্দ্ৰনাথ ঠাকুৰ বিশ্ববিদ্যালয়ৰ “বিধি”ত অনুমোদন জনায়। ইয়াৰ ফলত এতিয়াৰে পৰা বিশ্ববিদ্যালয়কেইখনে বিভিন্ন পৰিষদসমূহ গঠন কৰাৰ লগতে শৈক্ষিক কাৰ্যসূচী সূচাৰুৰূপে চলাই নিব পাৰিব।

কেবিনেটেত ৰাজ্যৰ সাম্প্ৰতিক ক’ভিড পৰিস্থিতৰ বিতং পৰ্যালোচনাৰ অন্তত সিদ্ধান্ত লোৱা হয় যে প্ৰচলিত ব্যৱস্থা অনুসৰি আগন্তুক উচ্চ মাধ্যমিক, হাই মাদ্ৰাছা আৰু উচ্চতৰ মাধ্যিমক চূড়ান্ত পৰীক্ষা অনুষ্ঠিত কৰা সম্ভৱ নহয়। সেয়েহে অহা ১৮ জুন তাৰিখে শিক্ষা বিভাগে সকলো পক্ষৰ সৈতে আলোচনাৰ মাধ্যমেৰে এই সংক্ৰান্তত চূড়ান্ত সিদ্ধান্ত গ্ৰহণ কৰিব।

লগতে পঢ়ক : কভিডসৃষ্ট পৰিস্থিতি পৰীক্ষা অনুষ্ঠিত কৰা নাযাব : কেবিনেটত সিদ্ধান্ত

সাম্প্ৰতিক ক’ভিড সংক্ৰমণৰ প্ৰতি লক্ষ্য ৰাখি কেবিনেটেত সুকীয়া শৌচাগাৰ আৰু কোঠাৰ ব্যৱস্থা নথকা ক’ভিড প’জিটিভ লোকক হোম আইচলেশ্যন প্ৰদান নকৰিবলৈ সিদ্ধান্ত লোৱা হয়। স্বাস্থ্য বিভাগ আৰু প্ৰশাসনে এই সিদ্ধান্ত কঠোৰভাৱে বলবৎ কৰিব লাগিব।

Subscribe to EastMojo Assam

Enter your email address to receive notifications of new stories by email.

Join 5,155 other subscribers

Leave a comment

Leave a Reply