গুৱাহাটী: গুৱাহাটীত লোকনিৰ্মাণ (পথ) বিভাগৰ নিৰ্মাণ কৰা দুখনকৈ পদপথ সেতু সোমবাৰে উদ্ধোধন কৰে বিভাগীয় মন্ত্ৰী হিমন্ত বিশ্ব শৰ্মাই। স্ব-অগ্ৰাধিকাৰ উন্নয়ন পুঁজিৰ ২০১৯-২০ অধীনত মহাপুৰুষ শ্ৰীমন্ত শংকৰদেৱ পথ (জি এছ ৰোড)ত নিৰ্মাণ কৰি উলিয়াইছে। ইয়াৰে এখনৰ নিৰ্মাণ ব্যয় ১০.০৬ কোটি আৰু আনখনত ব্যয় হৈছে ৯.৮৮ কোটি টকা |
এই পদপথ সেতু দুখন হৈছে এবিচিৰ মিজোৰাম ভৱনৰ সমীপত আৰু খীষ্টান বস্তিৰ মহিন্দ্ৰ শ্ব’ৰুমৰ সমীপত।
এবিচিৰ মিজোৰাম ভৱনৰ সমীপত নিৰ্মাণ কৰা পদপথ সেতুখন নিৰ্মাণত ব্যয় হৈছে মুঠ ১০ কোটি ৬ লাখ ৭১ হাজাৰ টকা। আনহাতে খীষ্টান বস্তিৰ মহিন্দ্ৰ শ্ব’ৰুমৰ সমীপত নিৰ্মাণ কৰা পদপথ সেতুখন নিৰ্মাণত ব্যয় হৈছে মুঠ ৯ কোটি ৮৮ লাখ টকা।
উল্লেখ্য যে নিৰ্ধাৰিত সময়তকৈ ৪ মাহ পূৰ্বেই নিৰ্মাণ সম্পূৰ্ণ হৈ উঠিছে এই ফুট অভাৰব্ৰীজ দুখন। ইফালে মহানগৰীত নিৰ্মাণৰত আন ৭খন পদপথ সেতুৰ কামো বৰ্তমান সময়ত যুদ্ধকালিনভাৱে চলি আছে।