গুৱাহাটীঃ বিৰোধী দলৰ প্ৰতিবাদৰ মাজতে সদনত গৃহীত হ’ল অসম আৰক্ষী (সংশোধনী) বিধেয়ক। এই বিধেয়কযোগে পূৰ্বৰ অসম আৰক্ষী আইন ২০০৭ লৈ ব্যাপক পৰিৱৰ্তন আনিব বিচৰা হৈছে। সংশোধনী বিধেয়কযোগে জিলা আৰক্ষীৰ দায়বদ্ধতা কৰ্তৃপক্ষৰ অধ্যক্ষ বা সদস্যসকলক দায়িত্বৰ পৰা আঁতৰাই দিয়াৰ ক্ষেত্ৰত পৰিৱৰ্তন অনা হৈছে।

বিধানসভাৰ শৰৎকালীন অধিৱেশনৰ অন্তিম দিনা অসম আৰক্ষী (সংশোধনী) বিধেয়কখন ছিলেক্ট কমিটীলৈ প্ৰেৰণৰ বাবে বিৰোধীয়ে জনোৱা দাবী অধ্যক্ষই অগ্ৰাহ্য কৰাৰ পিছতে সদন ত্যাগ কৰে কংগ্ৰেছ আৰু ৰাইজৰ দলে। সংসদীয় পৰিক্ৰমা মন্ত্ৰী পীয়ুষ হাজৰিকাই মুখ্যমন্ত্ৰী হিমন্ত বিশ্ব শৰ্মাৰ হৈ বিধেয়কখন সদনত উত্থাপন কৰে।

বিৰোধী দলৰ নেতা দেৱব্ৰত শইকীয়াই কয় যে অসম আৰক্ষী বিধেয়কখনত যি সংশোধনী আনিব বিচৰা হৈছে সেইয়া গ্ৰহণযোগ্য নহয়। এজন ডিআইজি পৰ্যায়ৰ বিষয়াই দায়বদ্ধতা কৰ্তৃপক্ষৰ মুৰব্বী হ’ব যিয়ে পৰিদৰ্শক আৰু তলৰ পদবীৰ বিষয়াসকলৰ বিৰুদ্ধে ‘অসদাচৰণ’ৰ গোচৰৰ মোকাবিলা কৰিব।

লগতে দেৱব্ৰত শইকীয়াই কয় যে কৰ্তৃপক্ষৰ অধ্যক্ষৰ দায়িত্বত এজন অৱসৰপ্ৰাপ্ত ন্যায়াধীশ অধিষ্ঠিত হ’ব লাগে। তেওঁ দাবী কৰে যে এই বিষয়টো উচ্চতম ন্যায়ালয়ৰ ৰায়ত বাধ্যতামূলক কৰা হৈছিল।

নিৰ্দলীয় বিধায়ক অখিল গগৈও কয় যে সংশোধনী বিধেয়ক যোগে আৰক্ষীকে আৰক্ষীৰ বিচাৰ কৰিবলৈ সুবিধা দিয়া হ’ব। দায়বদ্ধতা আয়োগৰ অধ্যক্ষৰ দায়িত্বত আৰক্ষী বিষয়াক নিয়োগ কৰাটো সমীচীন হ’ব নোৱাৰে।

বিৰোধী এআইইউডিএফৰ বিধায়ক আমিনুল ইছলাম আৰু চিপিআই(এম)ৰ বিধায়ক মনোৰঞ্জন তালুকদাৰেও এজন অৱসৰপ্ৰাপ্ত ন্যায়াধীশক সমিতিখনৰ মুৰব্বী হোৱাৰ দাবীক সমৰ্থন জনাইছিল। তেওঁলোকে এইটোও দাবী কৰিছিল যে বিভিন্ন ৰাজ্যৰ আৰক্ষী দায়বদ্ধতা সমিতিবোৰ বিভাগৰ জ্যেষ্ঠ বিষয়াসকলৰ দ্বাৰা পৰিচালিত হয়।

কংগ্ৰেছৰ বিধায়কসকলৰ লগতে অখিল গগৈয়ে বিধেয়কখন বিধানসভাৰ ছিলেক্ট কমিটীলৈ প্ৰেৰণ কৰিবলৈ দাবী জনায়। এই দাবী অগ্ৰাহ্য কৰাৰ লগে লগে কংগ্ৰেছ দলৰ লগতে ৰাইজৰ দলৰ বিধায়ক অখিল গগৈয়ে সদন ত্যাগ কৰে। ছিলেক্ট কমিটী হৈছে নিৰ্দিষ্ট সমস্যাৰ মোকাবিলা কৰিবলৈ সদনৰ কিছুমান সদস্যৰ দ্বাৰা গঠিত এটা পেনেল। অৱশেষত বিৰোধী দলৰ প্ৰতিবাদৰ মাজতে সংশোধনী বিধেয়কখন সদনত গৃহীত হয়।

Subscribe to EastMojo Assam

Enter your email address to receive notifications of new stories by email.

Join 6,479 other subscribers

Leave a comment

Leave a Reply Cancel reply