গুৱাহাটী : পেট্ৰ’ল, ডিজেল, ৰন্ধন গেছকে ধৰি নিত্য ব্যৱহাৰ্য সা-সামগ্ৰীৰ আকাশলংঘী মূল্যবৃদ্ধিৰ বিৰুদ্ধে কংগ্ৰেছ দলে ৰূপায়ন কৰিব এলানি প্ৰতিবাদী কাৰ্যসূচী। বিজেপি চৰকাৰৰ জনবিৰোধী নীতিৰ ফলত সম্প্ৰতি পেট্ৰ’ল, ডিজেল, ৰন্ধন গেছকে ধৰি নিত্য ব্যৱহাৰ্য সা-সামগ্ৰীৰ মূল্য আকাশলংঘী হৈছে আৰু সাধাৰণ জনতাৰ পানীত হাঁহ নচৰা অৱস্থাৰ সৃষ্টি হৈছে বুলি কংগ্ৰেছ দলৰ অভিযোগ। এনে পৰিপ্ৰেক্ষিততে যোৱা ২৪ জুন তাৰিখে কংগ্ৰেছ সভানেত্ৰী ছোনিয়া গান্ধীৰ সভাপতিত্বত অনুষ্ঠিত নিখিল ভাৰত কংগ্ৰেছ কমিটীৰ সাধাৰণ সম্পাদক তথা তত্ত্বাৱধায়কসকলৰ বৈঠকত সমগ্ৰ দেশজুৰি ৰূপায়ন কৰিবলগীয়া এলানি ব্যাপক আন্দোলনৰ কাৰ্যসূচী হাতত লোৱা হৈছে।
এই অনুসৰি অসমতো অহা ৭ জুলাইৰ পৰা ১৭ জুলাইৰ ভিতৰত ব্লক, জিলা আৰু ৰাজ্যিক পৰ্যায়ত এই প্ৰতিবাদী কাৰ্যসূচীলানি ৰূপায়ন কৰা হ’ব। অসমৰ লগতে সমগ্ৰ দেশজুৰি ৰূপায়ন কৰিবলগীয়া প্ৰতিবাদী কাৰ্যসূচীসমূহ হৈছে অহা ৭ জুলাইৰ পৰা ১৭ জুলাইৰ ভিতৰত ৰাজ্যৰ প্ৰতি ব্লক কংগ্ৰেছ কমিটীৰ উদ্যোগত ক’ভিড প্ৰট’কল ৰক্ষা কৰি দুঘণ্টীয়া প্ৰতিবাদী কাৰ্যসূচী ৰূপায়ন কৰা হ’ব। প্ৰতিবাদকাৰীসকলে কাঁহি বাতি বজাই, ধৰ্ণা দি প্ৰতিবাদ সাব্যস্ত কৰিব আৰু ইয়াত মহিলা কংগ্ৰেছ , যুৱ কংগ্ৰেছকে ধৰি ব্লক পৰ্যায়ৰ সকলো ভাতৃ-ভগ্নী সংগঠন, বিভাগ আৰু কোষৰ নেতৃত্বই অংশগ্ৰহণ কৰিব। প্ৰতি জিলা কংগ্ৰেছ কমিটীৰ উদ্যোগত জিলা আৰু মহকুমা সদৰত দলৰ নিৰ্বাচিত জনপ্ৰতিনিধিৰ লগতে সকলো পৰ্যায়ৰ বিষয়ববীয়াৰ অংশ গ্ৰহণেৰে নগৰাঞ্চল এলেকাত প্ৰতিবাদী চাইকেল সমদল উলিওৱা হ’ব।
লগতে পঢ়ক : হাটশিঙিমাৰীত আৰম্ভ হ’ল অনলাইন বেংকিং উপ ডাকঘৰ
উক্ত কাৰ্যসূচীত প্ৰতিবাদকাৰীসকলে বিভিন্ন দাবী সম্বলিত প্লেকাৰ্ড ব্যৱহাৰ কৰাৰ লগতে শ্লোগান দিব। অহা ১৭ জুলাইত ক’ভিড প্ৰট’কল মানি চলি প্ৰদেশ কংগ্ৰেছৰ উদ্যোগত ৰাজ্যৰ ৰাজধানী চহৰত প্ৰদেশ কংগ্ৰেছৰ সভাপতি, কংগ্ৰেছ বিধায়িনী দলৰ নেতা, সাংসদ, বিধায়ক তথা দলীয় বিষয়ববীয়াৰ অংশগ্ৰহণেৰে প্ৰতিবাদী সমদল বাহিৰ কৰা হ’ব।প্ৰতি জিলা কংগ্ৰেছ কমিটীৰ উদ্যোগত পেট্ৰ’ল পাম্পসমূহত গ্ৰাহকৰ পৰা স্বাক্ষৰ সংগ্ৰহ অভিযানো চলোৱা হ’ব।