নিউজ ডেস্ক: উজনি অসমৰ শিক্ষাৰ প্ৰাণ কেন্দ্ৰ ডিব্ৰুগড় বিশ্ববিদ্যালয়ৰ ২১ সংখ্যক দীক্ষান্ত সমাৰোহ অহা ৩ মে’ত অনুষ্ঠিত কৰা হ’ব।
বৰ্তমান লৈকে জানিব পৰা অনুসৰি, এই দীক্ষান্ত সমাৰোহত মুখ্য অতিথি হিচাপে দেশৰ উপ-ৰাষ্ট্ৰপতি জগদীপ ধনখেড়া উপস্থিত থাকিব। আনহাতে, এই সমাৰোহত সভাপতিত্ব কৰিব অসমৰ ৰাজ্যপাল তথা ডিব্ৰুগড় বিশ্ববিদ্যালয়ৰ আচাৰ্য গুলাব চান্দ কাটাৰিয়াই।
এইবাৰ দীক্ষান্ত সমাৰোহত ডিব্ৰুগড় বিশ্ববিদ্যালয়ৰ তৰফৰ পৰা সাহিত্য জগতত অনবদ্য অৱদান আগবঢ়োৱাৰ বাবে সাহিত্যিক নিৰুপমা বৰগোহাঞিক সন্মানীয় ডি লীট আৰু বতৰ বিজ্ঞানৰ গৱেষণাৰ ক্ষেত্ৰলৈ আগবঢ়োৱাৰ অৱদানৰ বাবে বিজ্ঞানী ড০ ভূপেন্দ্ৰ নাথ গোস্বামীক ডি এছ চি সন্মানেৰে সন্মানিত কৰা হ’ব।
জানিব পৰা অনুসৰি ২১ সংখ্যক দীক্ষান্ত সমাৰোহত মুঠ ১,৬৮৪ জন শিক্ষাৰ্থীয়ে অংশগ্ৰহণ কৰিব। তাৰে ৭৫ জনক পি এইচ ডি আৰু ৭২ জনক এম ফিল ডিগ্ৰী প্ৰদান কৰা হ’ব।