গুৱাহাটীঃ চলিত বৰ্ষৰ হাইস্কুল শিক্ষান্ত পৰীক্ষাত অসমীয়া বিষয়ৰ পৰীক্ষা অনুষ্ঠিত নকৰা সন্দৰ্ভত অসম মাধ্যমিক শিক্ষা পৰিষদে গ্ৰহণ কৰা সিদ্ধান্ত প্ৰত্যাহাৰ কৰি অন্য বিষয়ৰ সৈতে অসমীয়া বিষয়ৰো পৰীক্ষা অনুষ্ঠিত কৰাৰ দাবীৰে অসম জাতীয় পৰিষদে অসমৰ শিক্ষামন্ত্ৰী আৰু ছেবাৰ অধ্যক্ষক সাক্ষাৎ কৰি স্মাৰকপত্ৰ প্ৰদান কৰে ৷
দলৰ সভাপতি লুৰীণজ্যোতি গগৈ আৰু সাধাৰণ সম্পাদক জগদীশ ভূঞাই স্বাক্ষৰ কৰা স্মাৰকপত্ৰ দলৰ দুই মুখপাত্ৰ অমৃত কুমাৰ খাটনীয়াৰ আৰু অমিতাভ বৰঠাকুৰে ছেবাৰ অধ্যক্ষ ৰমেশচান্দ জৈনৰ হাতত অৰ্পন কৰে ৷
উল্লেখযোগ্য যে বিগত কিছুদিনৰ পৰা চৰকাৰৰ সংশ্লিষ্ট কৰ্তৃপক্ষৰ ফালৰ কৈ থকা হৈছে যে অহা জুলাই মাহত মেট্ৰিক পৰীক্ষা পতাৰ প্ৰস্তুতি লোৱা হৈছে আৰু ছাত্ৰ-ছাত্ৰীয়ে চাৰিটা বিষয়ৰহে পৰীক্ষা দিব লাগিব; য’ত মাতৃভাষা বিষয় অন্তৰ্ভূক্ত নহয় ৷
আৰু পঢ়কঃডবকাত জব্দ বৃহৎ পৰিমাণৰ বিলাতী সুৰা
অসম জাতীয় পৰিষদৰ মতে, মাতৃভাষা বিষয়ৰ অধ্যয়ন আইন মতে বাধ্যতামূলক আৰু সেয়া অসমীয়াকে ধৰি অসমৰ থলুৱা মাতৃভাষাসমূহৰ মৰ্যাদা অক্ষুন্ন ৰখাৰ বাবেও জৰুৰী৷ মাতৃভাষা বিষয়ৰ পৰীক্ষা নাপাতিলে শিক্ষাৰ্থীসকলৰ ওচৰত মাতৃভাষা বিষয়ৰ গুৰুত্ব কম বুলিহে বুজোৱা হ’ব৷
সেয়ে জাতীয় পৰিষদৰ স্মাৰকপত্ৰখনত কোৱা হয় যে চাৰিটা বিষয়ত পৰীক্ষা পতা সম্ভৱ হ’লে পাঁচটা বিষয়ত পতাটোও সম্ভৱ৷ কিন্তু কোনো অৱস্থাতে অসমীয়া আৰু বড়োসহ মাতৃভাষা বিষয়ৰ পৰীক্ষা পতাৰ পৰা বিৰত থকাটো উচিত নহ’ব৷
তাৎপৰ্যপূৰ্ণভাৱে, মঙলবাৰে জাতীয় পৰিষদৰ প্ৰতিনিধি দলটোয়ে শিক্ষামন্ত্ৰী পেগুক সাক্ষাৎ কৰোতে তেখেতে মাতৃভাষা বিষয়ৰ পৰীক্ষা পতাৰ গুৰুত্ব উপলব্ধি কৰি পৰীক্ষা পতা হ’ব বুলি আশ্বাস দিছিল৷ কিন্তু আজি জাতীয় পৰিষদৰ প্ৰতিনিধি দলটোৰ আগত ছেবাৰ অধ্যক্ষ জৈনে কয় যে ছেবাৰ পাঠ্যক্ৰমত অসমীয়াসহ মুঠ ১১ টা মাতৃভাষা পঢ়োৱা হয় আৰু সেই মতে মাতৃভাষাৰ পৰীক্ষা পাতিবলৈ হ’লে ১১টা মাতৃভাষাৰ প্ৰশ্ন কাটিব লাগিব, সেয়ে মাতৃভাষাৰ পৰীক্ষা পতাটো সম্ভৱ নহয়৷
ছেবাৰ অধ্যক্ষগৰাকীৰ মন্তব্যটোক অসম জাতীয় পৰিষদে টুলুঙা আৰু দায়িত্বহীন মন্তব্য বুলি অনুভৱ কৰে আৰু তাত অসমীয়াসহ থলুৱা মাতৃভাষাৰ বিৰুদ্ধে চলি থকা গোপন ষড়যন্ত্ৰ লুকাই আছে বুলি সন্দেহ কৰে৷ কাৰণ মাতৃভাষা বিষয়টোত অধিক পঢ়া-শুনা কৰা ছাত্ৰ-ছাত্ৰীয়ে তেনে পৰিস্থিতিত কলেজত আসন পাবলৈ এটা অসুবিধাজনক স্থিতিত উপনীত হ’ব; ফলত ইংৰাজী বিষয়ত অধ্যয়ন কৰা শিক্ষাৰ্থীয়ে অধিক প্ৰাধান্য পাব৷
গতিকে পৰিস্থিতি অনুকুল হ’লে যদি পৰীক্ষা পতা হয়, তেনেহ’লে মাতৃভাষা বিষয়কো অন্য জৰুৰী বিষয়ৰ সৈতে সমান গুৰুত্ব দিয়া হয়, তাৰ প্ৰতি সচেষ্ট হ’বলৈ জাতীয় পৰিষদে চৰকাৰ আৰু ছেবাক আহ্বান জনায়৷