অসম ক্ৰীড়া সাংবাদিক সন্থাই আয়োজন কৰা টপচেম আন্ত:মিডিয়া ক্ৰিকেট প্ৰতিযোগিতাত একেৰাহে দ্বিতীয় বাৰলৈ চেম্পিয়নৰ খিতাপ অৰ্জন কৰিলে গুৱাহাটী প্ৰেছ ক্লাবে । নেহৰু ষ্টেডিয়ামত অনুষ্ঠিত ফাইনেলত গুৱাহাটী প্ৰেছ ক্লাবে ১১ ৰাণত পৰাস্ত কৰে মিডিয়া মেনেজমেণ্টক ।
টছত জয়লাভ কৰি প্ৰথমে বেটিং কৰি গুৱাহাটী প্ৰেছ ক্লাবে নিৰ্ধাৰিত ২০ অভাৰত ৫ উইকেটৰ বিনিময়ত সংগ্ৰহ কৰে ১৩৮ ৰাণ । বেটিঙত গুৱাহাটী প্ৰেছ ক্লাৱৰ নয়ন প্রতিম কুমাৰে অপৰাজিত ৫৩ আৰু ৰবীন দাসে ২০ ৰাণ কৰে। প্ৰত্যুত্তৰত মিডিয়া মেনেজমেন্টে ২০ অভাৰত ৭ উইকেট হেৰুৱাই ১২৭ ৰাণ সংগ্ৰহ কৰে । বলিঙত গুৱাহাটী প্ৰেছ ক্লাবৰ হৈ ৰবীন দাসে ৩টা, দিগন্ত গোস্বামী আৰু আবুদ্দিন খানে লাভ কৰে ২ টাকৈ উইকেট ।
বেটিং আৰু বলিং দুয়োটাতে দুৰ্দান্ত প্ৰদৰ্শন আগবঢ়োৱা গুৱাহাটী প্ৰেছ ক্লাৱৰ ৰবীন দাসে মেন অব দ্য মেচৰ সন্মান লাভ কৰে। প্ৰতিযোগিতাখনৰ শ্ৰেষ্ঠ বেটাৰ হিচাপে নিৰ্বাচিত হয় গুৱাহাটী প্ৰেছ ক্লাবৰ মৃগাংক শৰ্মা । প্ৰতিযোগিতাৰ শেষত বিশিষ্ট ক্ৰীড়াবিদ তৈবুন নিচা, টপচেম চিমেণ্টৰ শীৰ্ষ বিষয়া অনিল কাপুৰ, জ্যেষ্ঠ ক্ৰীড়া সাংবাদিক পবিত্ৰ গগৈ, সুবোধমল্ল বৰুৱা আদিয়ে বঁটা প্ৰদান কৰে।