নিউজ ডেস্কঃ আজি গৰু বিহু । চত আৰু বহাগ মাহৰ সংক্ৰান্তিৰ দিনা গৰু বিহু পালন কৰা হয় । অসমীয়া চহা জীৱনৰ অন্যতম উৎসৱ এই গৰু বিহু। ৰাজ্যৰ বিভিন্ন প্ৰান্তত পালন কৰা হৈছে গৰু বিহু ।
গাওঁৰ কৃষক সকলে সাতমপুৰুষীয়া ৰীতি নীতি মানি পালন কৰে গৰু বিহু । পুৱাতেই ওচৰৰ নৈ বিল পুখুৰীত গা ধুৱাই । গা ধুৱাই লাওঁ বেঙেনা,হালধী গৰুৰ গালৈ মাৰি প্ৰতিজন অসমীয়া কৃষিজীৱী লোকে গায় – লাও খা বেঙেনা খা, বছৰে বছৰে বাঢ়ি যা ।
গৰু বিহুৰ দিনটোত পৰম্পৰা অনুসৰি, দীঘলতি, মাখিয়তি পাতেৰে গৰুৰ গাত কোবাই, লাও-বেঙেনা খুৱাই গৰুৰ দীৰ্ঘায়ু আৰু নশক্তি কামনা কৰে। সন্ধিয়া গৰুক আদৰ-সাদৰেৰে গোহালিলৈ অনা হয়৷ পিছত নতুন পঘাৰে গৰুক বন্ধাৰ উপৰিও গোহালি আৰু পদূলিত মৰলীয়া বন, অগৰু বন আৰু তুঁহৰ জাগ দি মাখিয়তী গছৰ পাত তথা ন-বিছনীৰে বিচি দি পিঠা-পনা খুওৱা হয়।
ৰাজ্যৰ অন্যান্য প্ৰান্তৰ লগতে আজি সোণাৰিতো পালন কৰা হৈছে গৰু বিহু। সোণাৰিৰ জনসাধাৰণে আজি পুৱাতেই পৰম্পৰা ৰক্ষা কৰি গৰু বিহু উদযাপন কৰিছে। মাহ-হালধিৰে গৰুক গা ধুওৱাৰ লগতে যথাৰীতি অনুসৰি পৰম্পৰা ৰক্ষাৰ চেষ্টা অব্যাহত ৰাখিছে।
আনহাতে বৃহস্পতিবাৰে ৰাজ্যত পালন কৰা হ’ব মানুহ বিহু । বিহুক লৈ চাৰিও ফালে উৎসাহ উদ্দীপনা দেখা গৈছে । ৰাজ্যৰ কোভিড পৰিস্থিতিৰ বাবে বিহুৰ ক্ষেত্ৰত বিভিন্ন ধৰনৰ নীতি নিৰ্দেশনা জাৰি কৰিছে ৰাজ্য চৰকাৰে ।
সমগ্ৰ ৰাজ্যৰ লগতে কামপুৰতো দেখা গৈছে গৰু বিহুৰ ব্যাপক উৎসাহ-উদ্দীপনা ৷ কামপুৰৰ বিভিন্ন প্ৰান্তত পৰম্পৰাগত ভাৱে গৰু গা-ধূৱাই গৰু বিহু পালন কৰিলে গাঁৱৰ ৰাইজে ৷ কামপুৰ তেতেলিসৰাত নিশাৰী নদীত গাঁৱৰ ৰাইজ একত্ৰিত হৈ সমূহীয়াকৈ গৰুৰ গা-ধূৱাই ৷ এই লৈ কামপুৰ-তেতেলিসৰাত দেখা গৈছে ব্যাপক উচাহ ৷ গাঁৱৰ কণ-কণ শিশুৰ পৰা আৰম্ভ কৰি ডেকা-গাভৰু, জেষ্ঠজন সকলো উলাই আহিছে নৈৰ ঘাটলৈ ৷ গৰু নোৱাই-ধুৱাই পৰম্পৰাগতভাৱে লাও,বেঙেনা, থেকেৰা গৰুৰ গালৈ দলিয়াই বিহুৰ সাতামপুৰুষীয়া ৰীতি-নীতি পালন কৰিছে গাঁৱৰ ৰাইজে ৷