মৰাণ: মাত্ৰ দুটামান দিন বাকী । দুৱাৰ মুখ পালেহি অসমীয়াৰ বাপুতি সাহোন ৰঙালী বিহুটি । চিৰা- পিঠা, জা-জলপানৰ পৰা বিহু আখৰাৰৰ লৈকে প্ৰায় সম্পূৰ্ণ হৈ উঠিছে বিহুৰ সকলো কৰ্মৰাজি । ইফালে কৃষক সকলে পৰম্পৰা ৰক্ষাৰ বাবে আপোন গৰুহালৰ বাবেও যাৱতীয় প্ৰায়বিলাক সামগ্ৰী প্ৰস্তুত কৰাত লাগিছে ।

কৃষক সকলৰ তেনে এক ব্যস্ততা দেখিবলৈ পোৱা গৈছে মৰাণৰ সমীপৰ খোৱাং দলনিকুঁ‌ৰত । গাঁওখনৰ প্ৰায় অৰ্ধশতাধিক পৰিয়াল ব্যস্ত এতিয়া তৰাৰ পঘা আৰু মৰাপাটৰ পঘা প্ৰস্তুত কৰাত । ইতিমধ্যে পৰিয়ালকেইটাই হাজাৰ হাজাৰ পঘা সমগ্ৰ ডিব্ৰুগড় আৰু শিৱসাগৰ জিলাৰ বিভিন্ন বজাৰত বিক্ৰী কৰিবলৈ উলিয়াই দিছে ।

পৰিয়ালকেইটাই জানিবলৈ দিয়া অনুসৰি তেওঁলোকে নিজেই খেতি কৰা মৰাপাট আৰু হাবিৰ পৰা বিচাৰি অনা তৰা গছেৰে মেৰামতি কৰে এই পঘা সমূহ । ফাগুন, চ’ত মাহৰ পৰা মেৰামতি কৰি সম্পূৰ্ণ হোৱা পঘাসমূহ বজাৰত ২২ টকাৰ পৰা ২৫ টকা দৰত পাৰকাৰী আৰু খুচুৰাকে বিক্ৰী কৰে । তেওঁলোকে বিহুৰ বাবে যাৱতীয় খৰচ এই পঘাৰ পৰাই উপাৰ্জন কৰে বুলি জানিবলৈ দিয়ে ।

ইফালে গৰু সংখ্যা কমিছে বুলি বিভিন্ন সময়ত চৰ্চা চলিলেও এই পঘাৰ আদৰ বা বিক্ৰীৰ পৰিমাণ এতিয়াও কমা নাই বুলি পৰিয়ালকেইটাই উল্লেখ কৰে । গৰু বিহু দিনা নতুন পঘাৰে বন্ধাতো অতীতৰে পৰা চলি আহিছে অসমীয়াৰ মাজত।এইবাৰো ব্যতিক্ৰম নহয় তাৰবাবেই অসমৰ গ্ৰাম্য জীৱনত এনে ছবি আজিও দেখা যায়।

Subscribe to EastMojo Assam

Enter your email address to receive notifications of new stories by email.

Join 6,127 other subscribers

Leave a comment

Leave a Reply Cancel reply