গুৱাহাটীঃ ৰূপকোঁৱৰ জ্যোতিপ্ৰসাদ আগৰৱালাৰ অমৰ সৃষ্টি ‘লভিতা’ক একে নামেৰে নতুন ৰূপত ভ্ৰাম্যমাণ নাট্যদল আবাহন থিয়েটাৰে মঞ্চস্থ কৰি একপ্ৰকাৰে ৰূপকোঁৱৰৰ অমৰ সৃষ্টিত কালিমা সনা কাৰ্যক তীব্র ভাষাৰে গৰিহণা দিছে ‘সাংস্কৃতিক সাংবাদিক সন্থা, অসম’এ।
সংগঠনটোৰ সভাপতি বিতোপন বৰবৰা আৰু সম্পাদক শিৱাণু বৰাই সংবাদ মাধ্যমলৈ প্ৰেৰণ কৰা এক প্ৰেছ বিবৃতিত কয় যে ৰূপকোঁৱৰ জ্যোতিপ্ৰসাদ আগৰৱালা, কলাগুৰু বিষ্ণুপ্ৰসাদ ৰাভা আৰু নটসূৰ্য ফণী শৰ্মা – এই ত্ৰিমূৰ্তিৰ সৃষ্টিৰাজিক লৈ ধেমালি কৰাটো আৱাহনৰ নিকৃষ্টতম ধৃষ্টতা। কাৰণ তেওঁলোকৰ মূল সৃষ্টিত হাত দিয়া মানে তেওঁলোকক কেৱল অপমান কৰাই নহয়, তেওঁলোকৰ মূল্যৱান সৃষ্টিৰাজিক অৱমাননা কৰাৰ লগতে অসমীয়া জাতি আৰু সংস্কৃতিকো অপমান কৰা হয় ।
যদিও শেহতীয়াকৈ ৰূপকোঁৱৰৰ জীয়ৰী, ভতিজা আদি প্ৰমুখ্যে আন নিকটাত্মীয়, জ্যোতি ভাৰতী, অসম নাট্য সন্মিলন, জ্যোতিপ্ৰসাদ আগৰৱালা স্মৃতি ৰক্ষা সমিতি আদিৰ লগতে বিভিন্ন সংগঠন আৰু অসমৰ বিদ্বৎ সমাজে আবাহন থিয়েটাৰৰ এই দুস্কার্যৰ বিৰুদ্ধে তীব্ৰ প্ৰতিবাদ জনোৱাৰ পাছত কালি নলবাৰীত আয়োজিত এখন সাংবাদিক মেলত আৱাহনৰ প্ৰযোজিকা-অভিনেত্ৰী প্ৰস্তুতি পৰাশৰে নাটকখনৰ নতুন নামকৰণ কৰিয়েই এনে ধৃষ্টতামূলক কার্যত গংগাজল ছটিৱাই দোষমুক্ত হোৱাৰ প্ৰয়াস কৰিছে যদিও তেওঁৰ সেই কাম অধিক নিকৃ্ষ্ট আৰু গৰিহনাযোগ্য বুলিহে সন্থাই বিবেচনা কৰে ৷ আনহাতে আৱাহন থিয়েটাৰে পৰিৱেশন কৰি থকা ‘লভিতা’ নাটকখনত মূল নাটকৰ কাহিনী, চৰিত্ৰসমূহ থকাৰ লগতে নাটকখনত থকা গীতৰ উপৰি ১৯৩৭ চনতেই জ্যোতিপ্ৰসাদ আগৰৱালাই ৰচনা কৰা ‘কাৰেঙৰ লিগিৰী’ নাটকখনৰ গীতো সন্নিবিষ্ট কৰি গঢ়া ‘ৰিমিক্সড’ নাটকখনক শেহতীয়াকৈ কালি অভিজিৎ ভট্টাচার্যই এইখন লভিতা তেওঁ নিজে লিখা বুলি কৰা দাবীয়ে ধৃষ্টতাৰ সকলো সীমা চেৰাই গৈছে বুলিও সন্থাই অভিহিত কৰে ৷
আৱাহন থিয়েটাৰে এতিয়া যিমানেই গংগাজলত জুবুৰিয়াই ‘ৰিমিক্সড’ নাটকখনক কালিমামুক্ত কৰিবলৈ চেষ্টা নকৰক লাগে জ্যোতিপ্ৰসাদ আগৰৱালাৰ মূল নাটকখনক লৈ কৰা বিকৃতিৰ অভিযোগৰ পৰা সহজতে নিস্তাৰ নাপায় আৰু এনে পৰিপ্ৰেক্ষিতত তেওঁলোকে নাটকখন আগলৈ মঞ্চস্থ কৰাৰ পৰা বিৰত থকাই একমাত্ৰ বিকল্প হ’ব বুলিও সন্থাই মত প্ৰকাশ কৰে ৷
জ্যোতিপ্ৰসাদ আগৰৱালাৰ নিকটাত্মীয়সকলৰ আবেগ-অনুভূতিৰ লগতে অসমৰ বিভিন্ন জাতীয় সংগঠন আৰু বিদ্বৎ সমাজৰ দাবীৰ প্ৰতি সন্মান জনাই নাটকখন নতুন নাম দিয়েই চলাই নিয়াৰ প্ৰতাৰণামূলক চাতুৰীৰ পথ লোৱাতকৈ নাটকখনৰ প্ৰদর্শন বন্ধ কৰিলেহে আৱাহন থিয়েটাৰক ৰাইজে ক্ষমা কৰিব বুলিও বিবৃতিটোত কোৱা হয়।