সোণাৰিঃ চৰাইদেউ জিলাৰ এদল যুৱক-যুৱতীৰ ব্যতিক্রমী পদক্ষেপ।
অসমীয়া পৰম্পৰাগত খাদ্য সম্ভাৰ জীয়াই ৰাখি আত্মনিৰ্ভৰ হৈ উঠিছে এদল যুৱক-যুৱতী।
চৰকাৰী চাকৰিৰ পাছে পাছে দৌৰী নুফুৰি নিজৰ উপাৰ্জনৰ পথ নিজে উলিয়াই লৈছে এইসকল যুৱক-যুৱতীয়ে।
চুকাফা নগৰৰ বিশ্বজিৎ গগৈ নামৰ উদ্যমী যুৱকজনে অসমীয়া বিভিন্ন ধৰণৰ পৰম্পৰাগত খাদ্য সম্ভাৰক লৈ ‘অসমীয়া পাকঘৰ’ নামৰ এটি অনুষ্ঠানৰ জৰিয়তে নিজৰ লগতে আন বহু যুৱক-যুৱতীৰ জীৱিকা নিৰ্বাহৰ পথ প্ৰশস্ত কৰিছে।
২০১৯ চনৰ জানুৱাৰীৰ পৰা যুৱকজনে খিলঞ্জীয়া যুৱক-যুৱতীৰ উদ্যোগত আৰম্ভ কৰে ‘অসমীয়া পাকঘৰ’ নামেৰে এটি অনুষ্ঠানৰ ৷
এই অসমীয়া পাকঘৰৰ জৰিয়তে বিভিন্ন সামাজিক অনুষ্ঠান, বিবাহ অনুষ্ঠান, ঘৰুৱা অনুষ্ঠান, উৎসৱ পাৰ্বন আদিত সম্পূৰ্ণ অসমীয়া ৰান্ধনীয়ে ৰন্ধা অসমীয়া তথা জনজাতীয় বিভিন্ন পৰম্পৰাগত খাদ্য পৰিবেশন কৰি আহিছে ৷
বৰ্তমানলৈকে প্ৰায় ১০০/ ১৫০ গৰাকী যুৱক-যুৱতীয়ে অসমীয়া পাকঘৰত কাম কৰি উপাৰ্জনক্ষম হৈ উঠিছে৷
সম্পূৰ্ণ অসমীয়া ৰান্ধনীয়ে ৰন্ধা অসমীয়া তথা জনজাতীয় বিভিন্ন পৰম্পৰাগত খাদ্য যেনে টোপোলা ভাত, মুগা-লেটা, পাতত দিয়া মাছ, ভাপত দিয়া মাছ, খৰিকাত দিয়া মাংস, বাঁহৰ চুঙাত দিয়া মাংস আদি পৰিবেশন কৰা ‘অসমীয়া পাকঘৰ’ সমগ্ৰ জিলাতে জনপ্ৰিয় হৈ পৰিছে।
খিলঞ্জীয়া যুৱক-যুৱতীৰ উদ্যোগত ‘অসমীয়া পাকঘৰ’ নামৰ এই কেটাৰিং সেৱাই বিয়া-সবাহ, বিভিন্ন অনুষ্ঠানত খাদ্য় পৰিবেশন কৰি বিশেষ সমাদৰ লাভ কৰিছে।
লগতে পঢ়কঃকিডনী ব্যৱসায় কাণ্ডৰ মূল অভিযুক্ত প্লাবন বৰঠাকুৰৰ জামিন নাকচ