বৰপেটাঃ বৰপেটাৰোডৰ শিমলাগুৰিত নাৰী সৰবৰাহকাৰী চক্ৰৰ বিৰুদ্ধে আৰক্ষীৰ বৃহৎ অভিযান৷ শিমলাগুৰি পহৰা চকীৰ আৰক্ষীৰ অভিযানত গ্ৰেপ্তাৰ এগৰাকী মহিলাসহ দুই নাৰী সৰবৰাহকাৰী ৷ ধৃত দুই নাৰী সৰবৰাহকাৰীৰ নাম প্ৰকাশ সাহানি আৰু পদুমী বৈশ্য বুলি জানিব পৰা গৈছে ৷ এই দুই নাৰী ব্যৱসায়ীয়ে বৰপেটাৰোড অঞ্চলৰ বহু যুৱতী-মহিলাক অপহৰণ আৰু প্ৰলোভনেৰে বহিঃৰাজ্যত বিক্ৰী কৰি আহিছিল ৷
বুধবাৰে শিমলাগুৰি পহৰা চকীৰ ভাৰপ্ৰাপ্ত বিষয়া কুমুদ শৰ্মাৰ নেতৃত্বত আৰক্ষীয়ে অভিযান চলাই দুই নাৰী সৰবৰাহকাৰীক গ্ৰেপ্তাৰৰ পিছতে পোহৰলৈ আহিছে বহুকেইগৰাকী মহিলাক বহিঃৰাজ্যত বিক্ৰীৰ ঘটনা ৷ এতিয়ালৈকে দুই নাৰী সৰবৰাহকাৰীৰ বিৰুদ্ধে থকা অভিযোগ সম্পৰ্কে তদন্তৰ খাতিৰত আৰক্ষীয়ে কোনো তথ্য ৰাজহুৱা কৰা নাই যদিও দুই অভিযুক্তক জেৰা চলাই আছে ৷