ভাৰত জোড়ো যাত্ৰা বাতিলৰ বাবে ৰাহুল গান্ধীলৈ নিৰ্দেশনা কেন্দ্ৰীয় স্বাস্থ্যমন্ত্ৰীৰ

অব্যাহত আছে কংগ্ৰেছৰ ভাৰত জোড়ো যাত্ৰা। কংগ্ৰেছৰ শীৰ্ষ নেতা ৰাহুল গান্ধীৰ নেতৃত্বত চলি থকা এই যাত্ৰাই ইতিমধ্যে তিনিমাহ অতিক্ৰম কৰিছে। দলটোৰ এই কাৰ্যসূচীয়ে লাভ কৰিছে ব্যাপক জনসমৰ্থন। গান্ধীৰ প্ৰতি সমৰ্থন আগবঢ়াই বিপুল সংখ্যক লোক অংশগ্ৰহণ কৰিছে ভাৰত জোড়ো যাত্ৰাত।

পিছে এই জনসমৰ্থনৰ মাজতে ৰাহুল গান্ধীয়ে লাভ কৰিছে এক বিশেষ নিৰ্দেশনা। কেন্দ্ৰীয় স্বাস্থ্যমন্ত্ৰী মানসুখ মাণ্ডব্যই গান্ধীলৈ এক পত্ৰ যোগে এই নিৰ্দেশনা প্ৰেৰণ কৰিছে। পত্ৰ যোগে মাণ্ডব্যই ৰাহুল গান্ধীক ‘ভাৰত জোডো যাত্ৰা’ত ক’ভিদ প্ৰট’কল পালন কৰিবলৈ অনুৰোধ জনাইছে।

যদি যাত্ৰাৰ সময়ত ক’ভিদ প্ৰট’কল অনুসৰণ নকৰে তেন্তে ৰাষ্ট্ৰীয় স্বাৰ্থত যাত্ৰা স্থগিত ৰাখিব লাগে বুলিও পত্ৰত উল্লেখ কৰে কেন্দ্ৰীয় স্বাস্থ্যমন্ত্ৰী গৰাকীয়ে।

উল্লেখ্য যে ভাৰতত বৰ্তমান কোনো ধৰণৰ ক’ভিদ প্ৰট’কল কাৰ্যকৰী হৈ থকা থকা নাই। দেশত ক’ভিদৰ সংক্ৰমণ হ্ৰাস পোৱাৰ বাবে ক’ভিদৰ প্ৰতি লক্ষ্য ৰাখি জাৰি কৰা সকলো নিষেধাজ্ঞা ইতিমধ্যে প্ৰত্যাহাৰ কৰা হৈছে।

ৰাহুল গান্ধীলৈ লিখা পত্ৰত কেন্দ্ৰীয় স্বাস্থ্যমন্ত্ৰী মাণ্ডব্যই কয়, “ মই ৰাহুল গান্ধীক অনুৰোধ কৰিছো যে পদযাত্ৰাৰ সময়ত মাস্ক আৰু চেনিটাইজাৰ ব্যৱহাৰকে ধৰি অন্যান্য ক’ভিদ প্ৰট’কল কঠোৰভাৱে পালন কৰা হওক আৰু কেৱল টিকাকৰণ কৰাসকলকহে যাত্ৰাত অংশগ্ৰহণ কৰিবলৈ দিয়া হওক।”

“যদি এই ক’ভিদ প্ৰট’কল মানি চলিব নোৱাৰি, তেন্তে জনস্বাস্থ্যৰ জৰুৰীকালীন অৱস্থাৰ প্ৰতি লক্ষ্য ৰাখি আৰু দেশক ক’ভিদ মহামাৰীৰ পৰা ৰক্ষা কৰাৰ বাবে ৰাষ্ট্ৰীয় স্বাৰ্থত ‘ভাৰত জোড়ো যাত্ৰা’ স্থগিত ৰাখিবলৈ অনুৰোধ জনালো।”

আনহাতে এই পত্ৰৰ প্ৰতি সঁহাৰি দি কংগ্ৰেছে শেহতীয়াকৈ গুজৰাটত প্ৰধানমন্ত্ৰী নৰেন্দ্ৰ মোডীৰ নিৰ্বাচনী প্ৰচাৰ আৰু বিজেপিৰ চলি থকা পদযাত্ৰাৰ বাবে এনে নিৰ্দেশনা প্ৰেৰণ কৰা হৈছিল নেকি বুলি প্ৰশ্ন তুলিছে। অৱশ্যে কংগ্ৰেছ নেতা ৰাহুল গান্ধীয়ে বৰ্তমান পৰ্যন্ত এই সন্দৰ্ভত কোনো প্ৰতিক্ৰিয়া প্ৰকাশ কৰা নাই।

Subscribe to EastMojo Assam

Enter your email address to receive notifications of new stories by email.

Join 6,740 other subscribers

Leave a comment

Leave a Reply Cancel reply