নিউজ ডেস্ক- ৰাজ্যত বৰ্তমান ভুৱা ফাৰ্মাচী আৰু ভুৱা ফাৰ্মাচিষ্ট, ভুৱা চিকিৎসক, অমান্য ঔষধে জনস্বাস্থ্যৰ প্ৰতি ভয়াৱহ ভাবুকি কঢ়িয়াই আনিছে। বহুতো ঠাইত এতিয়া অনুজ্ঞাপত্ৰৰ অবিহনে ফাৰ্মাচী চলাই থকা দেখিবলৈ পোৱা গৈছে।
কিছুদিন পূৰ্বে দেখা গৈছিল মৰিগাঁও জিলাৰ লাহোৰিঘাটত স্বাস্থ্য বিভাগে ছীল কৰিছিল ৮খন ফাৰ্মাচী। প্ৰয়োজনীয় অনুজ্ঞাপত্ৰ অবিহনে ফাৰ্মাচীসমূহ চলি আছিল। ইয়াৰ পূৰ্বে স্বাস্থ্য বিভাগটোৱে নগাঁও, বৰপেটা, আৰু দৰং জিলাৰ ভিতৰুৱা অঞ্চলত অবৈধভাৱে পৰিচালিত কেইবাখনো ফাৰ্মাচী ছীল কৰি দিছিল।
আনহাতে, কিছুদিন পূৰ্বে চিডিএছচিঅ’ (Central Drug Standard Control Organization)-এ বিভিন্ন গুণগত মানৰ পৰিমাপ পূৰণ কৰিব নোৱাৰা ৪৮টা ঔষধৰ তালিকা ঘোষণা কৰিছিল। এই তালিকাত বিভিন্ন ঔষধ যেনে কেলচিয়াম, মাল্টি ভিটামিনৰ ঔষধ, এন্টিবায়টিক, হৃদযন্ত্ৰৰ ঔষধ আদি অন্তৰ্ভুক্ত কৰা হৈছে। ইয়াৰ পাছতে স্বাস্থ্য বিভাগে বহুতো ঔষধ বজাৰৰ পৰা নিষিদ্ধ কৰাৰ পাছতো অসমৰ কেইবাখনো ফাৰ্মাচীত এতিয়াও এনেবোৰ ঔষধ বিক্ৰী কৰা হয়।
আনহাতে, ৰাজ্যত বিভিন্ন ঠাইত বিশেষকৈ চাহ বাগিচা অঞ্চল আৰু দুৰ্গম অঞ্চলতো ভুৱা চিকিৎসকক গ্ৰেপ্তাৰ কৰা হৈছে। অসম পঞ্জীয়নভুক্ত ফাৰ্মাচিষ্ট সংঘৰ তথ্য অনুসৰি ৰাজ্যখনত প্ৰায় ৩ হাজাৰ ফাৰ্মাচিষ্টৰ কোনো উপযুক্ত পঞ্জীয়ন নাছিল, আৰু ইয়াৰে ১৮০০ জনৰ পঞ্জীয়ন বাতিল কৰা হৈছিল।
লগতে কিছুমান ফাৰ্মাচিষ্টে কেইবাখনো ফাৰ্মাচীক নিজৰ নাম আৰু পঞ্জীয়ন নম্বৰ ভাড়াত দিয়ে আৰু তাৰ পৰা তেওঁলোকে বৃহৎ পৰিমাণৰ ধন উপাৰ্জন কৰে। আনহাতে বহু ফাৰ্মাচীয়ে কোনো ফাৰ্মাচিষ্টক নিয়োগ নকৰাকৈয়ে নিজৰ ব্যৱসায় চলায় থকা দেখা যায়।
উল্লেখ্য যে, স্বাস্থ্য বিভাগৰ নিয়ম অনুসৰি প্ৰতিখন ফাৰ্মাচীয়ে নিজৰ পঞ্জীয়নভুক্ত ফাৰ্মাচিষ্টৰ নাম আৰু পঞ্জীয়ন নম্বৰ দৃশ্যমানভাৱে প্ৰদৰ্শন কৰিব লাগিব।