একে আৰ্জেণ্টিনা, একে সমস্যা । বিগত দুবছৰে একক পৰিচয় আৰু সংঘবদ্ধতাৰে খেলি অহা প্ৰি-টুৰ্ণামেন্ট ফেভৰেট দলটোৰ বিশ্বকাপৰ জঠৰতা কালি মেক্সিকোৰ বিৰুদ্ধেও অব্যাহত আছিল । ছৌদি আৰৱৰ বিৰুদ্ধে অপ্ৰত্যাশিত পৰাজয়ৰ পাছত প্ৰশিক্ষক লিঅ’নেল স্কাল’নিয়ে ৰক্ষণ আৰু মিডফিল্ডত দুটা লক্ষ্যণীয় সালসলনি ঘটাইছিল ৷ ছৌদিৰ বিৰুদ্ধে ব্যৰ্থ টটেনহাম হটস্পাৰৰ ডিফেণ্ডাৰ ক্ৰিষ্টিয়ান ৰ’মেৰোৰ সলনি চেন্ট্ৰেল ডিফেন্সত নমোৱা হৈছিল মেনচেষ্টাৰ ইউনাইটেডৰ লিছান্দ্ৰো মাৰ্টিনেজক ৷ বাওঁদিশে উইং চম্ভালিবলৈ দিয়া হৈছিল ইংলিছ প্ৰিমিয়াৰ লীগৰে ক্লাব ব্ৰাইটন এণ্ড হোভ আলবিয়নৰ মেক এলিষ্টাৰক ৷

৪-৪-২ ফৰ্মেচনত দল সজোৱা স্কাল’নিৰ উদ্দেশ্য আছিল মেক্সিকোৰ ৫-৩-২ৰ ৰক্ষণাত্মক গাঁথনি মিডফিল্ড দখল কৰি ভেদ কৰা ৷ কিন্তু যিটো সমস্যা স্কাল’নিয়ে বিচাৰিলেও আঁতৰাব পৰা নাছিল সেইটো হৈছে দলত থকা এজন মৌলিক মিডফিল্ডাৰৰ অভাৱ ৷ লে ছেলছ’ৰ অবৰ্তমানত দলটোত বিপক্ষৰ শৃংখলাবদ্ধ ৰক্ষণ ছেদেলিভেদেলি কৰা পোনপটীয়া পাছ উলিয়াই দিয়া মিডফিল্ডাৰ নাই ৷ আচলতে হুৱান ৰোমান ৰিকলমেৰ পাছত আৰ্জেণ্টিনাই এজন সৃষ্টিশীল মিডফিল্ডাৰ পোৱাই নাই । কালি সেই দায়িত্ব ৰড্ৰিগ’ ডি পলক দিয়া হৈছিল যদিও ডি পলৰ শোচনীয় প্ৰদৰ্শন অব্যাহত থকাত আৰ্জেণ্টিনাৰ খেল মূলতঃ মেক্সিকোৰ বক্সৰ বাহিৰত ভোটা হৈ গৈছিল ৷ আক্ৰমণৰ সলনি পথাৰৰ অধিক গভীৰত বল দখলত লাগিব লগা হোৱাত লিঅ’নেল মেছি বাৰে বাৰে আৱদ্ধ হৈ পৰিব লগা হৈছিল মেক্সিকান ভিৰত ৷ আক্ৰমণৰ মূল অস্ত্ৰ মাজভাগত ৰৈ যোৱাত প্ৰথমাৰ্ধত আৰ্জেণ্টিনাই পোৱা নাছিল আক্ৰমণৰ কোনো মৌলিক সুযোগ ৷

মাত্ৰ সোঁ উইঙত এনহেল ডি মাৰিয়াই বাৰে বাৰে গতি আৰু কৌশলেৰে বল উলিয়াই নিছিল যদিও মূৰকত সহায়ৰ অভাৱত ব্যৰ্থ হৈছিল ৷ ছৌদিৰ বিৰুদ্ধে জীৱন্ত ইন্টাৰ মিলানৰ ষ্ট্ৰাইকাৰ লাউটাৰো মাৰ্টিনেজ কালি আছিল নিষ্প্ৰভ ৷ সেয়ে দ্বিতীয়াৰ্ধত স্কাল’নিয়ে স্বাভাৱিকতে ৰণকৌশল সলনি কৰিবলৈ বাধ্য হৈছিল ৷ মিডফিল্ডৰ দুৰ্বলতা ঢাকিবলৈ অনা হৈছিল পথাৰৰ অধিক অংশ সামৰি লোৱাৰ দক্ষতা থকা ষ্ট্ৰাইকাৰ মেনচেষ্টাৰ চিটীৰ জুলিয়ান আলভাৰেছক ৷ আৰু বেনফিকাৰ চেন্ট্ৰেল মিডফিল্ডাৰ ২১ বছৰীয়া এনজ’ ফাৰ্ণাণ্ডেজক ৷ লাহে লাহে আৰ্জেণ্টিনাৰ আক্ৰমণৰ চোক বাঢ়িছিল ৷ ৬৪ মিনিটত মেছিয়ে মেক্সিকোৰ বক্সৰ বাহিৰত ডি মাৰিয়াৰ এটা পাছত আয়ত্ত কৰি প্ৰায় ২৫ মিটাৰ দীঘলীয়া এটা দুৰ্দান্ত গ্ৰাউণ্ডেড শ্বটেৰে আৰ্জেণ্টিনাক অগ্ৰগতি দিয়ে ৷

লিঅ’নেল মেছিৰ সেই ৬৪ মিনিটত লোৱা অবিস্মৰণীয় শ্বট

৮৭ মিনিটত এনজ’ ফাৰ্ণাণ্ডেজে বাওঁদিশে মেছিৰ এটা পাছ আয়ত্ত কৰি ধেনুভেৰীয়া শ্বট এটাৰে মেক্সিকো গ’লকীপাৰ অ’চ’ৱাক আকৌ এবাৰ পৰাস্ত কৰে আৰু আৰ্জেণ্টিনাৰ বিশ্বকাপৰ সপোন জীৱন্ত ৰাখে ৷

মন কৰিব লাগিব যে কেৱল দৰ্শনীয় গ’লটোৱেই নহয়, মেছিৰ সামগ্ৰিক প্ৰভাৱ আৰ্জেণ্টিনাৰ বাবে কিমান দৰকাৰী তাক পৰিসংখ্যাই প্ৰমাণ কৰে ৷ এটা গ’ল আৰু এটা এছিষ্টেৰে মেন অব্‌ দ্য মেচ হোৱা মেছিৰ পাছিং সফলতা আছিল ৮৭.৮% ৷ ৯বাৰ বিপক্ষৰ খেলুৱৈৰে বল দখলৰ যুঁজত তেওঁ জয়ী হৈছিল ৷ ৭বাৰ ফাইনেল থাৰ্ডত অৰ্থাৎ বলসহ বিপক্ষৰ গ’লৰ নিচেই ওচৰত প্ৰৱেশ কৰিছিল, ৫টা ফাউল জয় কৰিছিল, তিনিটা ক্ৰছ দিছিল আৰু লৈছিল দুটা শ্বট ৷ এয়াও মিডফিল্ডত প্ৰায় এঘন্টা ধৰি একেবাৰে ন্যূনতম সহযোগ অবিহনে ৷

নিঃসন্দেহে পোলেণ্ডৰ বিৰুদ্ধে অন্তিম গ্ৰুপ মেচত মেছিৰপৰা আৰু আগ্ৰাসী ভূমিকা পাবলৈ স্কাল’নিয়ে আলভাৰেছ আৰু ফাৰ্ণাণ্ডেজক লৈ মেচ আৰম্ভ কৰাৰ পূৰ্ণ সম্ভাৱনা আছে ৷

পূৰ্বানুমান: ইতিমধ্যে গ্ৰুপ চি আকৰ্ষণীয় হৈ পৰিছে ৷ চাৰি পইণ্টেৰে শীৰ্ষত থকা পোলেণ্ডৰ বিৰুদ্ধে অন্তিম গ্ৰুপ মেচত জয়ী হ’লেই আৰ্জেণ্টিনা গ্ৰুপৰ শীৰ্ষস্থান লৈ নক্‌আউটলৈ যাব ৷ বিশ্বকাপ তুলিবলৈ অহা দলটোৰ বাবে মনোবল ঘূৰাই অনাৰ বাবে ইয়াতকৈ ভাল সুযোগ আৰু একো নোলাব ৷

Subscribe to EastMojo Assam

Enter your email address to receive notifications of new stories by email.

Join 6,741 other subscribers

Leave a comment

Leave a Reply Cancel reply