নিউজ ডেস্কঃ দেশজুৰি নূপুৰ শৰ্মাক লৈ বিতৰ্ক চলি থকাৰ মাজতে নূপুৰ শৰ্মা সন্দৰ্ভত উচ্চতম ন্যায়ালয়ে কৰা মন্তব্যক কেইবাজনো প্ৰাক্তন ন্যায়াধীশে সমালোচনা কৰিছে। ভাৰতৰ মুখ্য ন্যায়াধীশলৈ এই বিষয়ে অভিযোগ উত্থাপন কৰি ইতিমধ্যে পত্ৰ প্ৰেৰণ কৰিছে।কেৰালা উচ্চ ন্যায়ালয়ৰ প্ৰাক্তন ন্যায়াধীশ ৰবীন্দ্ৰনৰ এই অভিযোগ পত্ৰখনত ১৫ জন অৱসৰপ্ৰাপ্ত ন্যায়াধীশ, ৭৭ জন অৱসৰপ্ৰাপ্ত আমোলা, ২৫ জন অৱসৰপ্ৰাপ্ত সেনা বিষয়াই স্বাক্ষৰ কৰিছে আৰু সমৰ্থন জনাইছে।
নূপুৰ শৰ্মাই দেশৰ বিভিন্ন ৰাজ্যত তেওঁৰ বিৰুদ্ধে পঞ্জীয়ন কৰা সকলো গোচৰ একত্ৰিত কৰিবলৈ উচ্চতম ন্যায়ালয়ত এখন আবেদন দাখিল কৰিছিল। নূপুৰৰ আবেদনৰ শুনানিৰ সময়ত ন্যায়াধীশ সূৰ্যকান্ত আৰু জে বি পাৰ্দিৱালাৰ বিচাৰপীঠে পৰ্যৱেক্ষণ কৰি কৈছিল যে সমগ্ৰ দেশতে উদ্ভৱ হোৱা এই পৰিস্থিতিৰ বাবে নুপুৰ দায়বদ্ধ। এই মন্তব্যৰ পিছতে কেৰালা উচ্চ ন্যায়ালয়ৰ প্ৰাক্তন ন্যায়াধীশ পি এন ৰবীন্দ্ৰনে মুখ্য ন্যায়াধীশলৈ এখন পত্ৰ লিখি কয় যে উচ্চতম ন্যায়ালয়ৰ এই মন্তব্যই লক্ষ্মণ ৰেখা অতিক্ৰম কৰিছে। তেওঁৰ পত্ৰখনত ন্যায়পালিকা, আমোলা আৰু সেনাৰ ১১৭ জন প্ৰাক্তন বিষয়া আৰু ন্যায়াধীশৰ স্বাক্ষৰ প্ৰদান কৰিছে।
প্ৰাক্তন ন্যায়াধীশ পি এন ৰবীন্দ্ৰনৰ পত্ৰখনত কোৱা হৈছে, “এখন দেশৰ দায়িত্বশীল নাগৰিক হিচাপে বিশ্বাস কৰোঁ যে যেতিয়ালৈকে সকলো প্ৰতিষ্ঠানে সংবিধান অনুসৰি তেওঁলোকৰ দায়িত্ব পালন নকৰিব তেতিয়ালৈকে কোনো দেশৰ গণতন্ত্ৰ অক্ষত অৱস্থাত নাথাকিব। উচ্চতম ন্যায়ালয়ৰ দুজন ন্যায়াধীশে তেওঁলোকৰ শেহতীয়া পৰ্যৱেক্ষণত লক্ষ্মণ ৰেখা অতিক্ৰম কৰিছে আৰু আমাক এই বিবৃতি জাৰি কৰিবলৈ বাধ্য কৰিছে। এই পৰ্যৱেক্ষণবোৰ ন্যায়িক আদেশৰ অংশ নহয়। দেশৰ কেইবাখনো ৰাজ্যত তেওঁৰ বিৰুদ্ধে দাখিল কৰা গোচৰৰ সৈতে এজন ব্যক্তিক একত্ৰিত কৰাটো তেওঁৰ আইনী অধিকাৰ।”
ইয়াৰ উপৰিও জম্মু-কাশ্মীৰস্থিত সংগঠন ফ’ৰাম ফৰ হিউমেন ৰাইটছ এণ্ড ছ’চিয়েল জাষ্টিছেও নূপুৰ শৰ্মা সন্দৰ্ভত উচ্চতম ন্যায়ালয়ৰ মন্তব্যক সমালোচনা কৰি মুখ্য ন্যায়াধীশলৈ এখন পত্ৰ লিখিছে।
ন্যায়াধীশ সূৰ্যকান্তে নূপুৰ শৰ্মাক ভৰ্ৎসনা কৰি কয় যে তেওঁ দূৰদৰ্শনৰ মাধ্যমেৰে সমগ্ৰ দেশৰ ওচৰত ক্ষমা বিচাৰিব লাগিছিল। শাসকীয় দলৰ মুখপাত্ৰ হোৱাৰ বাবে, তেওঁৰ এনে মন্তব্য দিয়াৰ অধিকাৰ নাই। লগতে ন্যায়াধীশ সূৰ্যকান্তে নুপুৰ শৰ্মাৰ বক্তব্যক উদয়পুৰৰ ঘটনাৰ বাবে দায়ী কৰে। উচ্চতম ন্যায়ালয়ৰ এই মন্তব্যৰ পিছতে সামাজিক মাধ্যমত চৰ্চা আৰম্ভ হয়।
আনহাতে দিল্লী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ এছ.এন. ধিংৰাই নূপুৰ শৰ্মাৰ গোচৰত উচ্চতম ন্যায়ালয়ৰ মন্তব্য সমালোচনা কৰে। এটা নিউজ চেনেলৰ সৈতে হোৱা বাৰ্তালাপত তেওঁ কয়, “উচ্চতম ন্যায়ালয়ৰ এনেধৰণৰ মন্তব্য কৰাৰ কোনো অধিকাৰ নাই যি নেকি ন্যায় বিচাৰি অহা ব্যক্তিজনৰ সমগ্ৰ কেৰিয়াৰ ধ্বংস কৰি দিয়ে। সকলো আদালতে তেওঁৰ বিৰুদ্ধে পক্ষপাতিত্ব কৰা উচিত। উচ্চতম ন্যায়ালয়ে এক প্ৰকাৰে নূপুৰ শৰ্মাৰ কথা একো নুশুনাকৈ তেওঁক অভিযোগ দিয়ে আৰু ৰায়দান দিয়ে। সাক্ষ্য বা তদন্ত অবিহনে তেওঁৰ ব্যাখ্যা উপস্থাপন কৰাৰ কোনো সুযোগ দিয়া হোৱা নাছিল।”