নিউজ ডেস্কঃ লাডাখৰ সৌন্দৰ্য্য উপভোগ কৰিবলৈ এতিয়াৰ পৰা আপোনালোকে জম্মু -কাশ্মীৰৰ পৰা তিনি ঘন্টীয়া যাত্ৰা কৰিব নালাগে। মাত্ৰ ১৫ মিনিটৰ ভিতৰতে আপোনালোক লাডাখত গৈ উপস্থিত হ’ব পাৰিব।

কাৰণ জম্মু-কাশ্মীৰ আৰু লাডাখৰ মাজত নিৰ্মাণ কাৰ্য চলি থকা জোজিলা সুৰংগৰে লাডাখত উপস্থিত হ’বলৈ এতিয়াৰে পৰা সময় লাগিব মাত্ৰ ১৫ মিনিট।

সাগৰ পৃষ্ঠৰ পৰা ১১,000 বৰ্গ মিটাৰতকৈ অধিক উচ্চতাত নিৰ্মাণ হৈ থকা এই জোজিলা সুৰংগ এছিয়াৰ ভিতৰতে আটাইতকৈ দীঘল সুৰংগ হ’ব।

জোজিলা সুৰংগ ২০২৩ চনৰ ডিচেম্বৰৰ ভিতৰত সম্পূৰ্ণ হ’ব বুলি আশা কৰিছে কেন্দ্ৰ চৰকাৰে। কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে মঙলবাৰে জোজিলা সুৰংগৰ নিৰ্মাণ কাৰ্যৰ বুজ লয় ।

এই প্ৰকল্পটো ২০২৬ চনৰ ভিতৰত সম্পূৰ্ণ হোৱাৰ লক্ষ্য ৰখা হৈছে, যদিও সুৰংগটো পৰিদৰ্শন কৰি পৰিবহন মন্ত্ৰী নীতিন গাডকাৰীয়ে ২০২৪ চনৰ লোকসভা নিৰ্বাচনৰ পূৰ্বে সুৰংগটোৰ নিৰ্মাণ সম্পূৰ্ণ হ’ব বুলি উল্লেখ কৰে।

প্ৰচণ্ড তুষাৰপাতৰ বাবে কাশ্মীৰৰ পৰা লাডাখলৈ ৬ মাহৰ বাবে যোগাযোগ বন্ধ হৈ থাকে কিন্তু এই সুৰংগ সম্পূৰ্ণ হৈ উঠিলে কাশ্মীৰ-লাডাখৰ যোগাযোগ বাৰ মাহেই অব্যাহত থাকিব।

MEILৰ এজন মুখপাত্ৰই কয় যে নিৰ্ধাৰিত সময়ৰ ভিতৰত সুৰংগটোৰ নিৰ্মাণ সম্পূৰ্ণ কৰিবলৈ বৰফৰ ধুমুহা আৰু -৪০ ডিগ্ৰী তাপমাত্ৰাৰ মাজতো কাম জাৰি ৰখা হৈছে। সুৰংগটোৰে পানী লিক কৰি আছে আৰু বৰফৰ স্তৰ ৮ মাহ ধৰি জমা আছে। এই পৰিস্থিতিতো কাম অব্যাহত আছে।

কাশ্মীৰ উপত্যকাৰ হিমালয় পৰ্বতমালাৰ মাজত সাজু হৈ থকা ‘জোজিলা’ সুৰংগটোৰ নিৰ্মাণ কাৰ্য ২০২০ চনত আৰম্ভ হৈছিল। শ্ৰীনগৰ আৰু লেহ- লাডাখৰ মাজত সংযোগৰ বাবে জোজিলা পাছৰ ওচৰত মাত্ৰ এটা পথ আছে, কিন্তু এই পথটো গোটেই বছৰটো খোলা নাথাকে।

সেয়েহে জোজিলা সুৰংগই শীতকালতো শ্ৰীনগৰ আৰু লেহ- লাডাখৰ মাজত সংযোগ বৰ্তাই ৰাখিব শ্ৰীনগৰ আৰু লেহৰ মাজত ১ নং ৰাষ্ট্ৰীয় ঘাইপথত জোজিলা সুৰংগৰ নিৰ্মাণ কাৰ্য চলি আছে। ই ভাৰত-পাকিস্তান আৰু ভাৰত- চীন সীমান্তলৈ সেনা আৰু প্ৰতিৰক্ষা ক্ষেত্ৰত ব্যৱহৃত সামগ্ৰীৰ আদান-প্ৰদানো সহজ হৈ পৰিব। এইকাৰণেই কেন্দ্ৰীয় চৰকাৰে অতি সোনকালে এই সুৰংগ নিৰ্মাণ সম্পূৰ্ণ কৰাৰ ওপৰত গুৰুত্ব আৰোপ কৰিছে।

জোজিলা সুৰংগ নিৰ্মাণৰ বাবে অত্যাধুনিক প্ৰযুক্তি ব্যৱহাৰ কৰা হৈছে। সুৰংগটোত তাপ চিনাক্তকৰণ প্ৰণালী, চিচিটিভি, এলইডি স্ক্ৰীণ আৰু পোহৰ থাকিব। যদি সুৰংগটোৰ মাজত এখন গাড়ীত জুই লাগে, আধুনিক তাপ চিনাক্তকৰণ প্ৰণালীয়ে নিজকে চিনাক্ত কৰিব আৰু তাৰ পিছত জৰুৰীকালীন সঁহাৰি দলে বাহনখন উদ্ধাৰ কৰিব। হিমালয় পৰ্বতমালাত ইমান উচ্চতাত এনে সুৰংগ নিৰ্মাণ কৰাটো এটা অতি প্ৰত্যাহ্বানমূলক কাম আছিল। কেইবাখনো দেশক অধ্যয়ন কৰাৰ পিছত এই কৌশলটো বাছনি কৰা হৈছিল। এইটো ছুইডেন, ছুইজাৰলেণ্ড, নৰৱে আৰু বহুতো দেশৰ প্ৰযুক্তিক অধ্যয়ন কৰি কৰা হৈছে।

সমগ্ৰ জম্মু-কাশ্মীৰত কেন্দ্ৰীয় চৰকাৰৰ দ্বাৰা বৰ্তমান ২ লাখ কোটিতকৈও অধিক প্ৰকল্পৰ কাম চলি আছে, উপত্যকাটোৰ বিভিন্ন প্ৰান্তক সংযোগ কৰা সুৰংগ আৰু পথ নিৰ্মাণ কৰা হৈছে। পৰিবহণ মন্ত্ৰী নীতিন গাডকাৰীৰ মতে, অঞ্চলটোত সুৰংগ নিৰ্মাণে প্ৰায় তিনিৰ পৰা চাৰি হাজাৰ লোকক নিযুক্তি প্ৰদান কৰিছে। শ্ৰীনগৰ আৰু লেহৰ মাজত পৃথক পৃথক ১০,০০০ কোটি টকাৰ সুৰংগ নিৰ্মাণ কৰি থকা হৈছে।

লগতে পঢ়কঃপাঞ্জাৱ প্ৰদেশ কংগ্ৰেছৰ সভাপতি পদৰ পৰা সিদ্ধুৰ পদত্যাগ

Subscribe to EastMojo Assam

Enter your email address to receive notifications of new stories by email.

Join 5,346 other subscribers

Leave a comment

Leave a Reply