শিক্ষা বিভাগৰ ৰাজ্যিক মন্ত্ৰী শ্ৰীমতী অন্নপূৰ্ণা দেৱীয়ে আজি ৰাজ্যসভাত লিখিত উত্তৰত কয় যে, চৰকাৰে ২০২২-২৩ বিত্তীয় বৰ্ষৰ পৰা ২০২৬-২৭ চনলৈকে পাঁচ বছৰৰ ভিতৰত ৰূপায়ণৰ বাবে কেন্দ্ৰীয় পৃষ্ঠপোষকতাত নতুন আঁচনি অৰ্থাৎ, “নতুন ভাৰত সাক্ষৰতা কাৰ্যসূচী” (NILP) আৰম্ভ কৰিছে।
আৰু ইয়াৰ ভিতৰত কেন্দ্ৰীয় অংশীদাৰিত্ব ১০৩৭.৯০ কোটি টকাৰ আৰ্থিক ব্যয় হৈছে আৰু ৰাজ্যিক অংশীদাৰিত্ব ৩৩৭.৯০ কোটি টকা ব্যয় হৈছে।
জানিব পৰা মতে, এই আঁচনিৰ জৰিয়তে ১৫ বছৰ আৰু তাৰ ওপৰৰ বয়সৰ ৫.০০ কোটি অশিক্ষিতক সামৰি লোৱা হৈছে। এই আঁচনিখনৰ পাঁচটা উপাদান হৈছে: (i) মৌলিক সাক্ষৰতা আৰু সংখ্যা, (ii) সমালোচনাত্মক জীৱন দক্ষতা, (iii) বৃত্তিমূলক দক্ষতা বিকাশ, (iv) মৌলিক শিক্ষা আৰু (v) অবিৰত শিক্ষা।
আনহাতে, এই আঁচনিৰ অধীনত হিতাধিকাৰীসকলক ৰাজ্য/কেন্দ্ৰীয় শাসিত অঞ্চলৰ জৰীপকাৰীসকলে মোবাইল এপত ঘৰে ঘৰে জৰীপৰ জৰিয়তে চিনাক্তকৰণ কৰিব। মোবাইল এপৰ জৰিয়তে যিকোনো স্থানৰ পৰা পোনপটীয়া পঞ্জীয়নৰ জৰিয়তেও অসাক্ষৰসকলে আঁচনিৰ সুবিধা লাভ কৰিব পাৰিব। এই আঁচনিখন মূলতঃ পাঠদান-শিক্ষণৰ স্বেচ্ছাসেৱী কামৰ ওপৰত ভিত্তি কৰি গঢ় লৈ উঠিছে। ইয়াৰ বাবে স্বেচ্ছাসেৱকসকলে মোবাইল এপৰ জৰিয়তেও পঞ্জীয়ন কৰিব পাৰিব।
প্ৰযুক্তিৰ ওপৰত ভিত্তি কৰি এই আঁচনিখন প্ৰধানকৈ অনলাইন অৱস্হাৰ জৰিয়তে ৰূপায়ণ কৰা হৈছে। এনচিইআৰটিৰ DIKSHA প্লেটফৰ্মত পাঠদান শিক্ষণ সামগ্ৰী আৰু সম্পদসমূহ উপলব্ধ কৰা হৈছে। আৰু মোবাইল-এপসমূহৰ জৰিয়তে এই আচঁনি লাভ কৰিব পাৰিব। তদুপৰি আন আন ধৰণ যেনে টিভি, ৰেডিঅ’, সমাজিক চেতনা কেন্দ্ৰ আদিও মৌলিক সাক্ষৰতা আৰু অংকৰ প্ৰচাৰৰ বাবে ব্যৱহাৰ কৰিব লাগিব। ১৫ বছৰৰ ওপৰৰ অ-সাক্ষৰ সকলোৱে এই আঁচনিৰ সুবিধা লাভ কৰিব পাৰিব।