নিউজ ডেস্ক- আজি ৰাষ্ট্ৰপতি দ্রৌপদী মুৰ্মুৱে তিনিদিনীয়া ঝাৰখণ্ড ভ্ৰমণসূচীৰে দেওঘৰত উপস্থিত হয়। তেওঁক দেৱঘৰ বিমানবন্দৰৰ পৰা ৰাজ্যপাল চি পি ৰাধাকৃষ্ণনে আদৰণি জনায়।
ৰাঁচীত ৰাষ্ট্ৰপতিৰ কাৰ্যসূচীৰ প্ৰতি লক্ষ্য ৰাখি আৰক্ষীয়ে নিৰাপত্তা কঠোৰ কৰিছে। সাতজন আইপিএছ বিষয়াকে ধৰি ৫০ জনতকৈও অধিক ডিএছপি আৰু পৰিদৰ্শক আৰু ৩,০০০ কৰ্মচাৰী মোতায়েন কৰা হৈছে। ৰাস্তা আৰু ওখ অট্টালিকাবোৰত নিৰীক্ষণৰ বাবে বৃহৎ সংখ্যক আৰক্ষী কৰ্মী মোতায়েন কৰা হৈছে।
লগতে, ঝাৰখণ্ডৰ মুখ্যমন্ত্ৰী হেমন্ত সোৰেনে টুইট কৰি কয়, ‘ভূমি পুত্ৰ ভগৱান বিৰচা মুণ্ডাৰ পবিত্ৰ ভূমিত দেশৰ ৰাষ্ট্ৰপতি দ্রৌপদী মুমুলৈ আন্তৰিক আদৰণি আৰু অভিনন্দন।’
উল্লেখ্য যে, ৰাষ্ট্ৰপতিয়ে ৰাঁচীৰ বিভিন্ন কাৰ্যসূচীত অংশগ্ৰহণ কৰিব। এই কাৰ্যসূচীবোৰৰ ভিতৰত আছে বিচা মুণ্ডাৰ প্ৰতিমূৰ্তি আৰু ৰাঁচী বিমানবন্দৰ পথত এলবাৰ্ট এক্কাৰ প্ৰতিমূৰ্তিত মাল্যদান কৰা। লগতে তেওঁ ঝাৰখণ্ড উচ্চ ন্যায়ালয়ৰ নতুন ভৱনটো উদ্বোধন কৰিব আৰু ট্রিপল আইটিৰ সমাৱৰ্তন অনুষ্ঠানতো উপস্থিত থাকিব।
ৰাষ্ট্ৰপতিগৰাকীয়ে পুৱাৰ ভাগত দেওঘৰৰ বাবা বৈদ্যনাথ ধাম মন্দিৰত পুজা-অৰ্চনা কৰি ৰাঁচীলৈ ৰাওনা হৈছে।
ইফালে কাইলৈ তেওঁ ভাৰত চৰকাৰৰ জনজাতীয় পৰিক্ৰমা মন্ত্ৰালয়ৰ অধীনত বিৰচা মহাবিদ্যালয় খুণ্টিত আয়োজিত কাৰ্যসূচীত অংশগ্ৰহণ কৰাৰ লগতে আই.আই.টিৰ সমাৱৰ্তন কাৰ্যসূচীত অংশগ্রহণ কৰিব। আনহাতে, ৰাষ্ট্ৰপতি দ্ৰৌপদী মুৰ্মুয়ে ভ্ৰমণৰ অন্তিম দিনা অৰ্থাৎ ২৬ মে’ৰ দিনা দিল্লীলৈ ৰাওনা হ’ব।