ধিং এক্সপ্ৰেছ হিমা দাস

নিউজ ডেস্ক: ধিং এক্সপ্ৰেছ হিমা দাসে টকিঅ’ অলিম্পিকলৈ যোৱাৰ আশা এতিয়াও ত্যাগ কৰা নাই ৷
ইয়াৰ বাবে চলিত মাহৰ শেষৰফালে দীঘলীয়া অনুশীলন তথা প্রতিযোগিতামূলক ইভেণ্টৰ বাবে তুৰষ্কলৈ ৰাওনা হ’ব অসম কন্যা হিমা দাস৷ দেশৰ আগশাৰীৰ ট্রেক এণ্ড ফিল্ড এথলিটসকলৰ সৈতে হিমাই তুৰষ্কত উন্নত প্রশিক্ষণ ল’ব আৰু কেইবাখনো প্রতিযোগিতাত অংশগ্রহণ কৰিব৷

ভাৰতীয় এথলেটিক্ছ ফেডাৰেচনৰ সভাপতি আদিল ছুমাৰিৱালাই সংবাদ মাধ্যমৰ আগত এই কথা প্রকাশ কৰে৷ হিমাৰ সৈতে তুৰষ্কলৈ যাবলগীয়া দলটোত থাকিব তাৰকা জেভলিন থ্র’ৱাৰ নিৰজ চোপ্রা, শিৱপাল সিং আদি৷

উল্লেখ্য যে আগন্তুক অলিম্পিকৰ প্রতি লক্ষ্য ৰাখি ভাৰতীয় এথলেটিক্ছ ফেডাৰেচনে দেশৰ এথলিটসকলৰ বাবে তুৰষ্কত উন্নত প্রশিক্ষণৰ ব্যৱস্থা কৰিছে৷ ২০১৮ৰ এছিয়ান গেমছত ব্যক্তিগত ৪০০ মিটাৰত ৰূপ, মহিলাৰ ৪ x৪০০ মিটাৰ আৰু মিক্সড ৪ x৪০০ মিটাৰ ৰীলে দৌৰত স্বর্ণ পদক অর্জন কৰা হিমা দাসে তুর্কীত ৪ x১০০ মিটাৰ ৰীলে দৌৰৰ বাবে অনুশীলন চলাব৷ ভাৰতীয় ৰীলে দলটোৱে অহা ১–২ মে’ত পোলেণ্ডত বিশ্ব এথলেটিক্ছ ৰীলেত অংশ ল’ব৷এই প্রতিযোগিতাখনৰ শীর্ষ ৮টা দলে পোনপটীয়াকৈ টকিঅ’ অলিম্পিকলৈ যোগ্যতা অর্জন কৰিব৷ ভাৰতীয় মিক্সড৪ x৪০০ মিটাৰ ৰীলে দলটোৱে ২০১৯ৰ বিশ্ব চেম্পিয়নশ্বিপৰ ফাইনেললৈ উন্নীত হৈ ইতিমধ্যে অলিম্পিকলৈ যোগ্যতা অর্জন কৰিছে৷

মন কৰিবলগীয়া যে হিমা দাসে ব্যক্তিগত ১০০ মিটাৰ আৰু ২০০ মিটাৰত অলিম্পিকলৈ যোগ্যতা অর্জনৰ সুযোগ ইতিমধ্যে হেৰুৱাইছে৷ অৱশ্যে দলীয় ৰীলে ইভেণ্টত এতিয়াও তেওঁ অলিম্পিক খেলাৰ সুযোগ আছে৷এইবাৰ সৰ্বোচ্চ উজাৰি দি অহা জুলাই মাহত হবলগীয়া টকিঅ’ অলিম্পিকৰ বাবে শেষ যুঁজত নামিবলৈ সাঁজু হিমা দাস ৷

Subscribe to EastMojo Assam

Enter your email address to receive notifications of new stories by email.

Join 5,283 other subscribers

Leave a comment

Leave a Reply